Юрататӑп пурӑнма ялта:
Ҫуркунне ялта садсем илемлӗ!
Ҫӗмӗрт, улмуҫҫи, чие тата –
Шурӑ ҫеҫкепе епле киленмӗн?
Юрататӑп пурӑнма ялта:
Йӑранпах тем тӗрлӗ пахча ҫимӗҫ:
Ҫӗр улми, сухан та купӑста…
Урамра ав курӑкӗ сип-симӗс.
Юрататӑп пурӑнма ялта:
Сарӑлса выртать ҫап-ҫутӑ кӳлӗ.
Ан ӳркен алла тытма вӑлта,
Пулӑпа витрӳ кӗҫех сан тулӗ.
Юрататӑп пурӑнма ялта:
Уй-хирте тыр-пул ӳсет, кашлать.
Сарӑ тулӑ пуссинче, шалта,
Путене юрла-юрла ташлать.
Юрататӑп пурӑнма ялта:
Ял ҫынни ӗҫчен-ҫке ҫав тери!
Вӑранать вӑл тӑрирен малтан,
Ӗҫ нумай-ҫке, канӑҫсӑр чӗри.
Юрататӑп пурӑнма ялта:
Капӑр кермен пек
капмар ҫуртсем,
Ашӑ, ҫутӑ, хӑтлӑ газ пуртан.
Килсерен-тӗр пур машинӑсем.
Юрататӑп пурӑнма ялта…
Карягина, М. Юрататӑп пурӑнма ялта : [сӑвӑ] / Марина Карягина // Çӗршывӑмҫӑм, Чӑваш ҫӗршывӗ = Чувашия родная : сӑвӑсем / О. М. Иванова пухса хатӗрленӗ. – Шупашкар, 2020. – С. 13-14.