Алга Александр

Савнӑ ҫӗрӗм-шывӑм, ман тӑван ҫӗршывӑм!

Иртнӗ хурлӑхушӑн ҫитрӗ ырлӑху.

Йывӑр пусмӑр витӗр ҫӗнтерӳллӗн, сыввӑн

Тухрӗ Ҫӗн куна сан паттӑр халӑху.

Ирӗклӗ ҫӗршывӑн ирӗклӗх кун-ҫулӗ —

Шуҫӑмран пуҫланнӑ ҫуллахи кунсем.

Кӑнтӑрла ҫывхарӗ! Кун пек чух кам юлӗ

Уҫҫӑн юрламасӑр савнӑҫ юррисем?

Янӑрать-и юрӑ аслӑ ҫӗрӗм-шывӑм

Куҫ тулли уй-хир пек ешерни ҫинчен,

Савнӑ ҫӗрӗн-шывӑн савнӑҫлӑ хӗр-ывӑл

Паттӑррӑн, телейлӗн ҫитӗнни ҫинчен;

Янӑрать-и юрӑ сулхӑн каҫӑн-ирӗн

Ӗҫ юрри илемлӗн шӑранни ҫинчен,

Кӑмӑл ҫӗкленмелӗх, чун уҫҫилӗх пирӗн

Чӗрери чи ҫывӑх юрату ҫинчен;

Янӑрать-и юрӑ тӑвӑл-ҫулӑм умӗн

Чунсене пит ҫирӗп тытасси ҫинчен,

Хамӑрӑн ҫӗршывшӑн пурте ҫума-ҫумӑн,

Харӑссӑн тӑмашкӑн хатӗрри ҫинчен,—

Ҫамрӑклӑх сасси вӑл, унӑн вӑй-хӑвачӗ;

Ҫӗнӗ сывлӑш илнӗ ҫӗнӗ юрӑра

Тӗнчене чӑн пурнӑҫ параканӑн ячӗ,

Аслӑ Ленин ячӗ ӑшшӑн янӑрать.

Алга, А. Е. «Савнӑ ҫӗрӗм-шывӑм, ман тӑван ҫӗршывӑм!..» : [сӑвӑ] // Алга, А. Е. Сӑвӑсем / А. Е. Алга. – Шупашкар, 1962. – С. 17.

Юрататӑп сана, ҫӗрӗм-шывӑм,

Шуралса шуҫӑм килнӗ чухне.

Сывлӑша сыватса, уҫӑ сывлӑм

Ҫуса кайрӑ ял-йыш улӑхне.

Тӳперен ҫӑлтӑрсем ҫухалаҫҫӗ,

Темӗн вырӗ ҫав уйӑх-ҫурла?

Ҫӗр ҫинче ҫырмасем ҫуталаҫҫӗ,

Кайӑксем чарӑнмасӑр юрлаҫ.

Юрататӑп сана, ҫӗрӗм-шывӑм,

Хӗрелсе хӗвел тухнӑ чухне.

Ҫутҫанталӑкӑн сар хӗрӗ-шим вӑл:

Именетӗн пӑхма ун ҫине!

Пурҫӑн явлӑкӗ ярӑм та ярӑм

Витрӗ ешӗл, кӑтра вӑрмана;

Ҫӗр ҫине, шыв ҫине ылтӑн сарӑм

Выртрӗ, тейӗн — курсамӑр ӑна!

Ӗнтӗ каҫ ыйхине сирсе тартнӑ

Чун калать: ӗмӗр-ӗмӗр тавах

Пире пурнӑҫ парса кун кӑтартнӑ

Ҫутҫанталӑкпала Ҫӗршыва!

Алга, А. Е. «Юрататӑп сана, ҫӗрӗм-шывӑм…» : [сӑвӑ] // Алга, А. Е. Сӑвӑсем / Александр Алга. – Шупашкар, 1962. – С. 194.