ТАВАХ САНА, ЧǍВАШ ÇĔРШЫВĔ!
Çунат çапса, сиксех юрлать-и шӑнкӑрч
Йӑмра ҫинче, вӗллийӗ умӗнче,
Кӗрлет-и вар-ҫырма е шӑнкӑр-шӑнкӑр
Шӑнкӑртатать тӑри уй тӳпинче;
Сар хумсене ҫӑра та ҫӳллӗ тырӑ
Лӗп варкӑшпах-и васкатать чупма,
Е турата авса ҫиҫет улма, –
Шӑршийӗ уҫӑ-уҫӑ, тутлӑ, ырӑ, –
Ҫак сӑрсене юрра епле чун хывмӗ!..
Илемлӗ эсӗ, ман Чӑваш ҫӗршывӗ!
Шырлан шарлакӗ анана касатчӗ –
Хӗрри хӑваллӑ кӳлӗ ялтӑрать,
Сӗвексенче – колхоз вӑрманӗ, сачӗ,
Каҫ, хулари пек, ҫутӑ ялӑмрах, –
Ҫич-сакӑршар чӳречепе пӑхаҫҫӗ
Урамалла вӗр-ҫӗнӗ керменсем,
Тӑррисенче телеантеннӑсем
Ҫилпе е ҫилсӗрех тем калаҫаҫҫӗ;
Ҫырансене хӑпарчӗ Атӑл шывӗ…
Ҫӗнелтӗн эсӗ, ман Чӑваш ҫӗршывӗ!
Сӑну хавасӗ килеймен хӑй халлӗн,
Ансатӑн эс илмен ҫак тӗссене!
Эп вӗсенче куратӑп сан вӑй-халӑн
Хитре ҫӗкленӗвне, тӗреклӗхне.
Хӑвна ниҫта эс шеллемен пӗрре те!
Вут-тӑвӑлта-и е хӗрӳ ӗҫре –
Эс пынӑ геройла, малти ретре,
Кая нихҫан та юлмӑн эс – пӗлетӗп,
Шав ӳсӗн, пулӑн ӗмӗр-ӗмӗр сывӑ…
Малашлӑ эсӗ, ман Чӑваш ҫӗршывӗ!
Эс савӑнатӑн: паттӑртан та паттӑр
Сан ҫыннусем – цехра-и е хирте!
Эс халь тӑватӑн чи хӑватлӑ трактор,
Бетон ҫӑратӑн, гобелен тӗртен…
Ҫӗр пичӗ ҫех-и – космос та итлерӗ
Ҫӗн улӑпун хӑватлӑ сассине.
Туятӑн эс: пӑхать халь сан ҫине
Хисеплесе те тӗлӗнсе ҫӗн эра.
Санран та хаклине чун мӗншӗн шырӗ?
Телейлӗ эсӗ, ман Чӑваш ҫӗршывӗ!
Пӗp ӗмӗт пур: сана пуласчӗ тивӗҫ
Паян та ман, ыран та – яланах.
Тен, тахҫанхи пек, тем чӑтма та тивӗ? –
Хӗн-асапа пӗтерӗп санпалах!
Эпир, сан ачусем, санпа хӑватлӑ.
Санпа никам та ӑраскалсӑр мар,
Халь пурте пиллӗ, хастартан хастар,
Кашни ӗҫчен – мухтавлӑ, сумлӑ, ятлӑ;
Ним мар пире тип шӑрӑх, ҫатӑр сивӗ…
Тавах сана, тавах, Чӑваш ҫӗршывӗ!
Орлов, Г. Ф. Тавах сана, Чӑваш ҫӗршывӗ : [сӑвӑ] // Орлов, Г. Ф. Сӑвӑсем / Г. Ф. Орлов. – Шупашкар, 1989. – С. 10-11.