Асӑну палӑкӗсем пӗчӗк архитектура формисен шутне кӗреҫҫӗ. Мемориаллӑ архитектура ӗмӗрсем хушши аталанса пынӑ май, вӗсен чылай тӗсне ҫуратнӑ. Палӑксен пысӑк пайӗ пӗр-пӗр ҫынна е историри паллӑ пулӑма ӗмӗрлӗхе асра хӑварма тунӑ сооружени шутланать. Ытларах чухне ӑна вил тӑпри ҫине, е вӗсен тулашӗнче вырнаҫтараҫҫӗ. Асӑну палӑксем стелӑсем, обелисксем, статуйӑсем е монументсем евӗр пулма пултараҫҫӗ.
Чӑваш Республикин территорийӗнчи мемориал сооруженийӗсемпе вилнӗ салтаксене пытарнӑ вырӑнсем Тӑван Ҫӗршывӑн Аслӑ вӑрҫине, Пӗрремӗш тӗнче вӑрҫине, Граждан вӑрҫине, Афган вӑрҫине тата тӗрлӗ вӑрҫӑ хирӗҫӗвӗсене хутшӑннӑ, мирлӗ вӑхӑтра ҫар службин тивӗҫӗсене пурнӑҫланӑ чухне вилнӗ тӑван ҫӗршыв хӳтӗлевҫисене ӗмӗрлӗхе асра хӑварма лартнӑ палӑксем шутне кӗреҫҫӗ.
Шупашкар хулин чи мӑнаҫлӑ палӑкӗсенчен пӗри – Тӑван Ҫӗршывӑн Аслӑ вӑрҫинчи паттӑрлӑха халалласа лартнӑ Ҫар Мухтавӗн Монуменчӗ. Скульптурӑна 1980 ҫулта «Ҫӗнтерӳ» мемориал паркӗнче уҫнӑ. Унӑн никӗсӗ ҫумӗнче Сӳнми ҫулӑм ҫунать. Монумент ҫумӗпе 18 гранит стелӑран тӑракан Паттӑрсен аллейи тӑсӑлать. Стелӑсем ҫине Совет Союзӗн Геройӗсемпе Раҫҫей Геройӗсен ячӗсене ҫырса хунӑ. Ҫӗнтерӳ паркӗнче Тӑван ҫӗршывӑн Аслӑ вӑрҫинче пуҫ хунӑ, Афганистанпа Чечняра ҫапӑҫнӑ салтаксене, чӑваш морякӗсене, ҫавӑн пекех Чернобыльти АЭСри аварие пӗтерме хутшӑннисене асӑнса палӑксем уҫнӑ. Чӑн-чӑн паттӑрсене асӑнса лартнӑ палӑксем Чӑваш Енре нумай. Сӑмахран, Совет Союзӗн Геройӗсене асӑнса лартнӑ палӑк-бюстсене чылай ҫӗрте уҫнӑ. 1967-мӗш ҫулта Шӑмӑршӑри вӑтам шкул территорийӗнче Совет Союзӗн Геройӗн В.И. Уруковӑн бюстне лартнӑ. Куславкка хулин Культура ҫурчӗ ҫывӑхӗнче Совет Союзӗн Геройӗн А.Н. Ленкинӑн бюстне вырнаҫтарнӑ. 1984 ҫулта Муркаш районӗнчи Исетерккӗ ялӗнче сакӑр ывӑл ҫуратса ӳстернӗ Татьяна Николаевна Николаева палӑкне уҫнӑ. Палӑк Раҫҫей халӑхӗ кирек хӑш вӑхӑтра та Тӑван ҫӗршыва хӳтӗлеме хатӗррине пӗлтерет.
Можарова Г. Г. Памятные места и достопримечательности города Чебоксары и Чувашской АССР / Г. Г. Можаров, А. С. Никитин. – Чебоксары, 1987. – С. 119-120, 148.
Чӑваш Республикин территорийӗнчи мемориал сооруженийӗсемпе вилнӗ салтаксене пытарнӑ вырӑнсене Наци библиотекин электронлӑ базине кӗртнӗ. Электронлӑ базӑна Тӑван ҫӗршыв хӳтӗлевҫисен ятне ӗмӗрлӗхе асра хӑварас тӗллевпе лартнӑ мемориал сооруженийӗсемпе асӑну вырӑнӗсем ҫинчен ҫырса кӑтартнисене пухнӑ.
2025 ҫул вӗҫнелле ҫак базӑра Чӑваш Республикин территорийӗнче вырнаҫнӑ 2041 мемориал палӑкӗпе салтак вил тӑприйӗсем ҫинчен ҫырса кӑтартнисем тата вӗсен сӑн ӳкерчӗкӗсем пур. Ҫав шутра, Тӑван ҫӗршывӑн Аслӑ вӑрҫине халалланӑ асӑну палӑкӗсем – 1400; тӗрлӗ вӑрҫӑ хирӗҫӗвӗсене халалланӑ мемориал объекчӗсем – 331; 298 ҫар пытарӑвӗ.
2022-мӗш ҫулта Куславкка округӗнчи Куснар ялӗ ҫывӑхӗнче Тӑван ҫӗршывӑн аслӑ вӑрҫи ҫулӗсенчи ӗҫ паттӑрлӑхне халалланӑ мемориал уҫнӑ. Мемориал 38 тимӗр стелӑран тӑрать, вӗсенчен кашниех 10 километр тӑсӑлакан хӳтӗлев сооруженийӗсене пӗлтерет, мӗншӗн тесен Сӑр чиккин тӑршшӗ 380 километр пулнӑ-ҫке. Ҫак проекта пурнӑҫланӑ скульпторпа архитектор шухӑшӗпе, варринчи шар – Ҫӗр символӗ. Ун ҫинчи ҫурӑк – ҫӗр ӳчӗ ҫинчи ҫӗвӗ, ӑна ҫынсем хӑйсен аллипе тунӑ.
«Чӗмсӗр чикӗсене тӑвакансене» мемориал палӑкӗ ҫинчен видеосюжет