Чӑваш Енре пурӑнакан халӑхсен пурнӑҫӗнче вӑрман мӗн ӗлӗкрен пысӑк вырӑн йышӑннӑ. Ҫырса хӑварнисем тӑрӑх, пӑлхар йӑхӗсем шурлӑхлӑ вырӑнсенче тата сӗм вӑрмансенче пурӑннӑ. Пин ҫул ытла каялла Ахмед ибн Фадлан араб историкӗ Атӑлҫи Пӑлхар ҫӗршывне кайса килни ҫинчен аса илсе ҫапла ҫырнӑ: «… Эпӗ вӗсен ҫӗршывӗнче ҫав тери нумай шӗшкӗ йывӑҫҫинчен ытла нимӗн те курман. Эпӗ ҫавӑн пек вӑрмансем курнӑ: кашни вӑрманӗн тӑршшӗ – хӗрӗх фарсах, сарлакӑшӗ те ҫавӑн чухлӗ…» (И. Красногорскаян «Ближе к земле, ближе к природе» статйинчен).
Чӑваш ялне сӑнласа паллӑ историк-этнограф Г. И. Комиссаров ҫапла палӑртать: «…аякран раща куратӑр пулсан, унта ҫитерехпе вӑл ял пулса тӑрать, ҫавӑнпа пӗлсемӗр, эсир чӑваш ялне куратӑр. Чӑвашсем йывӑҫсене питӗ юратаҫҫӗ, ҫавӑнпа вӗсен ялӗсемпе салисем дачӑсене аса илтереҫҫӗ. Тип ҫырмасенче йӑмра, йӗтемсем ҫинче йӑмрасӑр пуҫне хурӑн, ҫуртсем ҫывӑхӗнче тата урамсенче вара улма-ҫырла йывӑҫҫисемсӗр пуҫне пилеш, ҫӗмӗрт, ҫӑка, хурама, ӑвӑс лартаҫҫӗ… Чӑваш ялӗсем ӑвӑс ращисемпе пуян, ҫуллахи вӑхӑтра унта сулхӑн, пушар вӑхӑтӗнче вара вут-ҫулӑмран хӳтӗлеҫҫӗ» (Г.И. Комиссаровӑн «Чуваши Казанского Заволжья» кӗнекинчен).
XVIII-мӗш ӗмӗр пуҫламӑшӗнчен пуҫласа XIX-мӗш ӗмӗрӗн пӗрремӗш ҫурричченхи Чӑваш Енри вӑрман хуҫалӑхӗн историйӗ – карап вӑрманӗсен историйӗ. Раҫҫей патшалӑхне тӗреклетес ӗҫре чӑваш юманӗсемпе нумай усӑ курни ҫинчен хӑюллӑн ҫирӗплетсех калама пулать. Чӑваш Енӗн революцичченхи патшалӑх тата удел вӑрман хуҫалӑхӗсене аталантарас ӗҫне Питӗрти вӑрман институтӗнчен, Мускав ҫывӑхӗнчи Петровски ҫӗр ӗҫӗпе вӑрман академийӗнчен, Сӗнтӗрвӑрринчи кӗҫӗн вӑрман шкулӗнчен вӗренсе тухнисенчен Б. И. Гузовский, С. В. Дьяков, А. И. Скашевский, Ф. Ф. Ясковский, А. Т. Тиханов, М. Д. Дмитриев, А. И. Ашмарин тата ыттисем те пысӑк тӳпе хывнӑ.
Леса и лесное хозяйство Чувашской Республики с XIX века по 2002 год : научно-вспомогательный библиографический указатель / Чуваш. гос. ун-т им.И. Н. Ульянова, Нац. б-ка Чуваш. Респ. – Чебоксары : Изд-во ЧГУ, 2005. – 55, [1] с.