Пӗр-пӗр пулӑма халалласа е кама та пулин асӑнса лартнӑ палӑк тӗрлӗ формӑллӑ пулма пултарать: монумент статуйисемпе бюстсенчен пуҫласа мемориал хӑмисемпе стелӑсем таранах. Вӗсен тӗллевӗ – историпе культурӑна, наукӑпа искусствӑна е общество пурнӑҫне пысӑк тӳпе хывнисене ӗмӗрлӗхе асра хӑварасси.
Час-часах палӑксене ҫыннӑн пурнӑҫӗпе е ӗҫӗ-хӗлӗпе ҫыхӑннӑ вырӑнсенче, сӑмахран, унӑн тӑван ҫӗршывӗнче, вӑл паттӑрла ӗҫ тунӑ хулара е ялта вырнаҫтараҫҫӗ. Палӑксене паллӑ ҫынсене асӑнса лартнӑсӑр пуҫне историре пысӑк вырӑн йышӑннӑ пулӑмсене те халаллама пултараҫҫӗ. Тӗслӗхрен, Василий Иванович Чапаев палӑкне Шупашкар хулин Чапаев скверӗнче, Шупашкарти приборсем тӑвакан заводӑн (халӗ «Элара» АУО) пӗрремӗш директорӗн Глеб Андреевич Ильенкӑн палӑкне заводӑн проходнойӗпе юнашар лартнӑ. Куславкка муниципалитет округӗн Куснар ялӗ ҫывӑхӗнче Сӑр тата Хусан хӳтӗлев чиккисене тунӑ ҫӗрте вӑй хунӑ ентешсене асӑнса Мемориал комплексӗ уҫнӑ.
Сӑр тата Хусан хӳтӗлев чиккисем (Чӑваш республикин Наци библиотекин электронлӑ коллекцийӗ)
Палӑртса хӑвармалла: палӑк пысӑк та капмар пулмасан та пултарать. Унӑн вырӑнӗнче паллӑ ҫын пурӑннӑ ҫурт ҫине вырнаҫтарнӑ пысӑках мар мемориал хӑми е ӑна асӑнса лартнӑ йывӑҫ та пулма пултарать. Чи кирли – палӑк хӑйӗн тӗп тивӗҫне пурнӑҫлатӑр ⎯ паллӑ ҫынсемпе пулӑмсене ӗмӗрлӗхе асра хӑварма май патӑр.
Чӑваш енре пӗр-пӗр пулӑм е ятлӑ-сумлӑ ҫынсен ячӗпе ҫӗкленӗ палӑксем йышлӑ. Шупашкар хулин паллӑ палӑкӗсенчен пӗри, В.И. Чапаев комдив палӑкӗ. Хальхи чӑваш ҫырулӑхне йӗркелекен, халӑха ҫутта кӑларакан И.Я. Яковлевӑн палӑкӗ – сӑнарлӑх тӗлӗшӗнчен пысӑк пӗлтерӗшлӗ. Чӑваш Енӗн тӗп хулине тӗнчери пӗрремӗш космонавтсенчен пӗрне А.Г. Николаева, карап тӑвас ӗҫ ӑҫчахне А.Н. Крылова, чӑваш сӑвӑҫне Ҫеҫпӗл Мишшине, тухӑҫ тӗпчевҫипе вырӑс синологине никӗслекенсенчен пӗрне Н.Я. Бичурина, В.В. Николаевпа Г.Н. Волков академиксене, чӑваш литературин никӗслевҫине К. Иванова, чӑваш халӑх поэтне П. Хузангая, П.Е. Егоров архитектора, чӑваш халӑх художникне Э. Юрьева тата ытти паллӑ ҫынсене халалланӑ палӑкӗсем илем кӳреҫҫӗ.
Анне-Хӗрарӑм – ку яланах тӑнӑҫлӑхпа юратӑвӑн синонимӗ. Тӑван ачисене хӳтӗлекен, юратакан амӑшӗн сӑнарне кӑтартакан Анне Монуменчӗ – Чӑваш Енӗн тӗп символӗ.
Федоров, Н. В. Аннене пӗтӗм халӑхпа пуҫ таятпӑр : Николай Федоров Президент сӑмахӗ: [Аннене халалланӑ монумента уҫнӑ чух каланӑ сӑмах] / Н. В. Федоров // Хыпар. – 2003. – 13 ҫу. – С. 1-2.