Уявсенче, чӳксем вӑхӑтӗнче пухӑннӑ ҫынсене сӑрапа хӑналанӑ. Темиҫе тӗрлӗ сӑра тунӑ: чи кунӗ сӑрана чей тата квас вырӑнне кашни кунах ӗҫме пултарнӑ. Хаяррине уявсенче ҫеҫ ӗҫнӗ. Авалхи чӑваш сӑри ҫӑра пулнӑ, сывлӑхшӑн усӑллӑ шутланнӑ, мӗншӗн тесен ӑна шӑтарнӑ чӑн–чӑн таса тырӑран тунӑ тата хӑмла ярса вӗретнӗ. Сӑрана тӗрлӗ ялта тӗрлӗрен тунӑ. Кашни кил хуҫи хӗрарӑмӗн ҫак ӗҫре хӑйӗн вӑрттӑнлӑхӗсем пулнӑ.
Ӗлӗкхи мелсемпе сӑра тӑвасси вӑл – кӑткӑс ӗҫ, тата ӑна тума вӑхӑт та нумай кирлӗ. Кашни килтех сӑра лаҫҫи пулнӑ, унта сӑра тунӑ чухне усӑ курмалли савӑтсем упраннӑ. Ҫулла сӑрана шыв хӗрринче вӗретнӗ. Сӑра тума салат, хӑмла тата ҫӗпре кирлӗ пулнӑ. Салат валли урпана (е ыраша) шӳтернӗ те тӗттӗм ҫӗре шӑтарма сарса хунӑ. Тепӗр темиҫе кунтан урпа (е ыраш) сӑмсаланнӑ. Ӑна кӑмака ҫине е салат лаҫҫине сарса хурса типӗтнӗ, унтан авӑртнӑ. Салат тума 9-12 кун кирлӗ пулнӑ. Салата каткана янӑ та вӗретнӗ шыв хушса лайӑх пӑтратнӑ. Унтан салат пылаклантӑр тесе каткана темиҫе сехетлӗхе татӑкпа витсе лартнӑ. Тепӗр хут вӗри шыв ярса пӑтратнӑ хыҫҫӑн ятарласа тунӑ кункӑра (шан, такана) тӗпне таса улӑм сарнӑ; ун пӗр пуҫӗнче шӑтӑк пулнӑ. Кункӑрана ҫӳле лартнӑ, аяла, шӑтӑк тӗлне, – катка. Кункӑрана асӑрханса шывпа салат хутӑшӗ янӑ, вӑл улӑм витӗр сӑрхӑнса каткана юхса тухнӑ. Ҫак пылак шӗвеке ӑсла тенӗ. Унтан хӑмла вӗретнӗ те сивӗтме лартнӑ. Сивӗннӗ хӑмлана ӑслана янӑ, ҫӗпре хушнӑ. Тепӗр талӑкран сӑра йӳҫсе ҫитнӗ. Ӑна алапа сӗрсе пичкене янӑ та нӳхрепе антарнӑ.